《空間及圍爐之重要性》
搬左屋踏進第4星期，感覺良好。除左各人有番自己空間外，都有一個原因係因為呢個區真係小香港，作為父母聽到仔女講返學開心時，識到朋友仔，放學要去朋友屋企玩個心都安落曬。
弟弟第一日放學回家好開心就講「我識到個好似維維嘅朋友」（自那天起，「加拿大維維」成為那同學嘅代號），亦搵到另一位「形影不離」friend到要日日時時刻刻要見面嘅朋友仔，唔想缺席任何一日上學添。雖然家姐要受學法文之苦，掛住香港啲閏蜜朋友外，佢仍能分享返學係開心嘅，返學返得開心都係感恩。加上同人分享讀邊間學校時，眾人都話讀緊嘅學校係好好學校，呢個係額外恩典。（因我從無考慮過學校嘅因素）
嚟到呢區，有好多同聲同氣嘅鄰居外，仲有一種從前香港鄰里關係嘅感覺。因為大家身處海外，無工人/4大長老，有乜事要行開行埋都真係call一call「幫我接一接放學，暫時未行得開。」「放左學5點去你屋企玩呀！」「一齊去買餸」「今期呢個超抵買」「買左袋薯仔好大袋，畀一啲你」。好似回到兒時嘅街坊生活咁。
可能，呢啲係香港人失落左嘅事，或係買少見少，大家每日顧住返工返學、上堂學嘢、趕成績/業績，hea成為左奢侈品，每個人都返7放10，戶戶緊閉又點使搵隔離屋。
《學滿師了，落山祝福人》
在港離別前紛紛與人分享或被祝福都係將我在主裡所領受、擁有嘅好嘢帶到去加國祝福人。其實嚟左5個月，我有時都會想收埋下，因為自己心態都仲調整緊、仍在適應中，我都想睇定啲、觀摩下先再算。不過有時天父都好有趣，係好神奇地畀我地遇上不同嘅弟兄姊妹不約而同地無啦啦同我地分享佢哋嘅事，其實同佢地一啲都唔熟，但當佢地分享到一啲深層嘅感受，彷彿提醒我佢畀我/Antony嘅呼召，究竟前路如何？真係唔知道，繼續行步見步啦。
有得就有失、有取就有捨，確實人生不停地在得與失、取與捨之間遊走；世界亦無烏托邦，在香港會有其問題，來到加拿大也有其問題，世界也是如此。
嚟左5個月，有時都會諗過係咪決定錯左；又有時會覺得真係需要離開香港；但呢啲思潮就算留港都會出現，每次跌落思潮深淵時，主都藉着不同嘅人和物去話我知，唔緊要，主總是看顧我（一家），總與我同在，佢總有佢心意/工作要我去做。
沒有留言 :
發佈留言