打針記

李思予出世後，就要到健康院覆診及打左針！感恩每次覆診都得醫護人員的稱讚「打針唔喊播」、「手指小肌肉好好播」、「成長得好好播」、「食野好叻喎」等等。第1,2,4個月個時打針佢確實無乜反應, 叫左一聲之後又會倒頭大睡，但自6個月個3支針佢開始會喊喇，仲要好好笑添架!

話說尋日去覆1歲診兼打2支針，一路等就一路行行企企，又撩下人玩，又認為自己可以同一些高佢半個至一個頭既哥哥姐姐玩，又要行去其他家長度望下人咁，見姑娘時仲係咁撩晒成房既姑娘同佢講野，又要同人SAY HI!，攪到D姑娘都要同佢講幾句先叫下一個入黎，呢位小姐心情大靚丫。

咁見完晒姑娘最後一個環節就係去打針喇，由於婆婆都有去，所以就好夠人去捉實呢隻豬喇。係姑娘預備途中，心情大靚的小姐仍然笑容滿面，得戚無比。
當姑娘真係拮落去個下，聽到一隻豬大叫左一下「呀!!!」(姑娘當然繼續好快手咁吉埋另一針啦) ……………..然後靜止差不多10-15秒(世界彷彿停頓了)………..換氣後的豬兜就叫出全健康院都聽到的一聲「呀!!!!!!!!!!!!!!!!!!!!!!!!!!!!!!!!!!!!!!!!!!!!!」面谷紅了、眼淚流下來了，出房後其他家長、嬸嬸都要走來看看她，打算可憐她，誰知說時遲那時快，阿媽塞左粒士多啤梨俾佢之後即刻止住了，還露出滿足的面容，令到圍觀的人都歎為觀止。

回想起這兩三分鐘，實在好好笑。(作為阿媽的都不禁要俾100個LIKE!)

教導孩子也是這樣，打針確實是痛的，但其實痛過後便不會痛，路也要繼續走，如果大家給孩子一種可憐、呵護他的反應，我相信他會繼續的哭，直至他認為被「呵夠」便會停下來。
自問我這位媽媽不是呵護型，每次女兒跌倒撞倒都在旁一邊笑她，一邊看著她自己站起來然後稱讚她。因為我深信在成長的路上，跌倒或不如意的事十有八九，如可以在旁鼓勵他、指引他再一次自己站起來，拍拍灰塵繼續向前走，那孩子亦會明白跌倒不緊要，緊要的是以什麼的心態去面對和繼續走下去，我相信孩子將會變得更加堅強和勇敢。

但願思予那份「攪笑」和堅強的本色繼續與她一同成長！

予娘