郊遊攝影團-第一次出隊

今日我地成班人，去左行山，兼攝影‧
開頭唸住行釣魚翁，但經過一輪考慮，最終改行將軍澳堡壘，比較易行，時間亦都會短d‧
由行山專家，志強同吳思源帶隊，更有專業攝影師albert親自教路，學左好多攝影技巧~~~~
真係影相靚左好多~

我地兩點喺教會出發，志強講解左好多行山需要注意既野，例如要帶足夠食水，唔好著彩色衫，因為會吸引昆蟲~~咁著彩色衫既人就反轉左件衫黎著......搭巴士果陣呢就~搞笑d囉~~
跟住就搭巴士~開始我地呢一日既旅程.係途中我地有講有笑，好快就到左目的地‧

由巴士站行到去山頂大約有一個鐘頭路程‧行左一陣，我地巳經急不及待拎自己既相機出黎，一路周圍影(係攝影師帶頭架咋~)，搞到導遊係前面係咁威迫利誘：再唔行，有排都上唔到山呀‧....不如上到山頂先影啦，果度靚d呀‧.......前面果度有個好靚既蜘蛛網呀~快d過黎影啦‧.....呢度個光好正呀~快d過黎啦‧

沿路albert教我地了解自己部相機，甚至傻瓜機，實行用盡佢既功能，影出專業級數既相‧而且真係影得到喎~

搞左一大輪，終於一大班人都到左一條長命樓梯前面，其實如果唔係導遊帶住，都唔係幾見到有條樓梯係路邊‧開始一大班人行上去山頂，有好多平時唔係點運動既人巳經啞晒救命，而有d人就掛住周圍影下一d民間既建設‧

終於行到上山，大家都可以抖返啖氣，飲下水‧
導遊指住前面既另一個山頂，開始講解，呢個地方可以睇到成個將軍澳，前面有個亭，係一班行山既大隻佬搬石頭起架‧我地開始行去另一個山，途中佢詳細介紹每一棵植物既名~又講左有d絲帶綁係樹上面既作用，原來係俾人認返方向，行去正路‧
而albert就襯住呢段路，同唔同既人，影一d靚相~(佢都係鐘意影人多d，設計d post影出黎真係幾有效果，有d影到好似廣告既poster咁‧)
行下行下，到左對面山既山頂，大家再一次有機會抖下‧係抖既時間，albert就繼續發揮佢既技術，教我地點樣去影人‧原來一個肥仔，靠鏡頭就下就下，都可以影得好slim‧所以話，相中既靚人真係唔係好信得過‧咁女士係呢個時間，當然係爭住影"靚相"啦~

抖完之後，再次出發，終於行到堡壘，呢個係抗日戰爭遺留落黎既遺址，對住將軍澳沿海，係軍事有利位置，放個砲台係中間就可以對付沿海入侵既敵人‧宜家就成為影相既好地方‧導遊努力講解堡壘作用，攝影師就努力教我地影特別既相~我地當然係樂在其中，而且真係學左好多野~.
但講返呢個堡壘，佢巳經俾好多人塗鴉，整污糟晒(雖然用黎影相真係好靚,但真係要用photoshop執走d字先囉)‧仲有句野係用油係呢個建築寫住"保護歷史"，真諷刺!

最尾，行山落返尚德村，一齊成身臭汗咁，去嘆返個tea先各自各返屋企~~就係咁享受左"完美"既一日‧不過今次阿寶唔係度，又好似爭咁d野咁~


下一次出隊日係627