係時候訓啦，傻女。

好多朋友，以為亞李爸爸特別錫思予，錫得不能離開半尺(或許有時，我自己也這麼認為)，早前的馬來西亞一星期旅遊前後，朋友也紛紛詢問：「唔見成個星期，你唔掛住佢既咩？」

老實說，旅行期間，真係唔係幾掛，就算晚上透過FACETIME與寄居婆婆家既思予作短chat 時間，我都係點到即止，反而係予娘常流露掛住既表情(尤其是BUM 奶時)。直到旅程結束果日，我先同予娘講：「我有D掛住個女呢。」怎料，立即換來予娘的投訴，並講出一個寓言故事：「從前有個主人，養左一隻貓，一隻狗，主人因有事需要出外公幹，係主人離家既每一日，忠心既狗仔，就每日都好掛住主人，而隻貓就如無事發生一樣，點知當主人就返到門口既時候，隻貓就表現到超掛住主人咁，於是，主人返到屋企就同樣讚佢地，都一樣咁乖。」佢就係咁話我扮晒野。(雖然搵貓狗同主人既關係比喻雙親同女既關係有點不倫不類)

其後我又反思，雖然我都好錫思予，但都希望可以做到狠心，做一個懶爸媽，就好似同予娘當初立既底線一樣：「一切以父母需要作優先考慮，孩子不會是家庭焦點。」

(雖然都幾經掙扎、備受考驗，有時都需要予娘提我。就好似之前係一間毛公仔鋪頭，思予一入到去，見到某幾個公仔就笑到見牙唔見眼，亞李爸爸就扮作潚灑講句：「又唔係貴，不如買左佢啦，妳睇佢笑得幾開心？」予娘就即刻講：「睇定D先啦，佢鐘意你就買，咁你銀包有幾錢先夠？」當頭棒喝，唯有聽命。) 

呢幾日，唔知係因為出得街多(思予超鐘意出街，話佢唔係E女都無人信)定係食錯野，思予唔單止出街時係咁FING手FING腳，撩人講野。返到屋企，到左夜晚十一、二點都唔捨得訓，唔理熄唔熄燈，佢都係張床度四圍郁...

仲要好似騎馬咁"UN"下"UN"，搞到我同予娘都啼笑皆非(亞李爸爸心裡流下好幾滴汗，當初思予未出世，仲擔心：「屋企如有兩個E既人，我呢個I仔點算呢.....」)。最後，唯有熄晒燈，我捉住佢對手，攬實佢，嚴肅咁同佢講：「好啦，係時候訓啦，無得玩啦！」起初佢不斷掙扎。反抗左一輪、啞左一輪後，見我訓著左(扮)，雖有死死地氣，慢慢穩住呼吸，慢慢平靜心情 (我一開返眼就見到，佢眼定定咁望住我)。我再溫柔咁同佢講聲：「夜啦，合埋眼訓啦，傻女。」之後就見佢慢慢咁將眼簾閉上。(雖然年紀少少，我覺得佢係明我地講乜既)呼吸慢慢平靜，慢慢發出細細聲既鼻鼾聲，我就迷糊間進入夢鄉，隱約感到，予娘慢慢鬆開我攬住思予既手，抱住呢個入睡左既BB 返佢自己既床仔....

Antony