痛，唔痛呀？

話說今朝起身照常逗思予痾屎。

 

當亞李爸爸抱住思予入廁所時，唔小心夾倒思予的小手，立即很擔心的摸著她的手，問：「無事丫嘛？有無夾痛妳？試下郁下手仔？」狀甚緊張！但起初望佢表情，好似又無乜野，定晴望住爸爸。點知過左兩秒後，思予就嗯、嗯、呀、嘩咁，想喊出黎。

 

係呢個時候，係房聽倒聲走出黎既予娘觀察住全個過程，就話勒：「好少事之嘛，按幾下咪無事囉，妳唔係喊吓？」

思予喊左兩聲之後，聽到予娘咁講，就收左聲，如常痾屎。跟住阿李爸爸再仔細觀察手仔，原來的確被夾瘀左好少一撻。

 

記得以前係兒童區，好多時有小朋友跌親，唔同既爸爸媽媽有著唔同既處理手法。有D父母見倒，就會立即飛奔過去，好緊張咁問乜事，而個小朋友就會按慣例，擁著爸爸媽媽放聲大哭。而我見過有一次，有個爸爸個女跌左落地，佢唔扶佢不特止，仲同佢講：「跌下又唔痛既，自己起返身再去玩過啦！」跟住個女就好快咁爬起身，再去搵朋友仔玩過。

 

之後同個爸爸傾左兩句，原來佢既理念係：「其實細路仔跌左落地未必自己覺得痛，佢地大喊，好多時係被爸爸媽媽既反應嚇親，或者係見到爸爸媽媽既表情，知道自己應該『要』痛，同借D 倚撒嬌！反而你唔話俾佢知『要』痛，佢就會覺得無乜野。」之後我同阿寶再傾，又覺得其實幾有道理。

 

其實小朋友對世界既理解，好多時都係嚟自父母既演釋而已。