移加剛剛一個月，最近最多人問我哋嘅一個問題係：「適唔適應呀？」，當然被關心真係好窩心。我又會點答呢？我都出自真心講「哦！ok呀，呢邊生活好舒服呀！周圍嘅人都好幫我地融入吖！」其實決定嚟呢邊，都真係有做功課、真係有預備自己改變生活節奏、模式嘅心態架。不過每問一次都要我誠實地面對自己，邊會咁快適應？從小到大，有強大嘅家庭支持、有各界好友陪住、自主嘅生活模式，要玩有玩、要食有食、有工作有事奉…感覺就像當年新婚後、生仔生女後所面對新身份、面對新嘅家人生活習慣、模式的適應，真係要用時間，也非一頭半個月可以攪掂。
當然呢個都係性格使然，所以李移加分左2黨，一黨係李父女、一黨係李母子。母子2人關係主導，頓時無曬最親密嘅家人好友係要用多啲時間去調適。父女2人相對地「無咁要人一齊」，加上呢邊嘅生活節奏真係輕鬆，真係人生活嘅節奏、係容易適應、投入嘅。
雖然話就話仲要時間適應，但其實天父預備好多天使係身邊嘅。返緊嘅教會好有愛，我哋一家都好被接待、關顧。有好多牧者、弟兄姊妹幫我地搭路&幫我留意工作，張羅傢俬、用品，又會車出車入、傾偈、介紹周圍地方、抵買筍野，等我地一家更容易投入加拿大嘅生活。而教會崇拜時嘅敬拜雖都同香港模式（應該係生命頌）有啲分別，但呢邊幾乎95%係唱廣東話詩歌，係好熟悉、好入心被感動嘅。所以有神係好好嘅，佢無應許天色常藍（呢邊仲係春天，真係千變萬化），但應許與我同行，都已經夠喇。
呢2日係加拿大嘅long weekend，我哋去左downtown、又放煙花（Victoria day)，都係好新奇嘅生活經驗。喺香港，同圍都downtown一樣，嚟到呢邊去downtown真係大鄉里出城，真係好有分別。學校係唔會有功課，因為放假就要出去玩。所以都真係好充實、好用體力
收到船運消息：家當已抵達溫哥華，好快好快會運嚟多倫多喇！希望有番自己用品會更有親切感咁去繼續生活啦。
沒有留言 :
發佈留言